Kan lehkhabute min lo hlutsak avângin kan lawm e. Coronavirus (COVID-19) hripui leng avângin tûn hunah hian, dâka thawn chhuahna lam khar rih niin ebook download tûr chauh kan nei a. Ebook te i download tawha, mahse a bu-a dawn i duh tho a nih chuan a theih hunah kan rawn thawn ang che, a nih loh pawhin a bu-a a awm hma i nghak duh a nih chuan, thla rei lotê hnuah kan website hi i lo check dâwn nia.

Midangte share ve rawh le


Engtin nge Ngaihtuahna Khûm zo Thlamuanna ka neih ang?

Engtin nge Ngaihtuahna Khûm zo Thlamuanna ka neih ang?

Mi tam tak chuan muanna neih theihna kawng awmchhun chu kan pawn lam thil thlengte thunun tumna hmangin a ni tiin an ngaihtuah a. Amaherawhchu, a nihna takah chuan kan chhehvela thil thlengte chuan min thunun zâwk a. Pawn lama thil thlengte chu muanawm tak nise tih kan beisei mai thei a, nimahsela chutih a hnêkin kan nun chu muanna zawng leh vawn ṭhat tuma beihnain a khat a ni. Bible chuan nundân kawng danglam daih a hailang thung a; he nundân hi chuan kan chhehvêlah eng pawh thleng se, muanna sâng zâwk, thûk zâwk, daih rei zâwk leh engkim khûm a thlen a ni.

Tin Pathian remna, mihring ngaihtuahna tinrêng khûmtu chuan, in thinlung leh in ngaihtuahnate chu Krista Isuaah chuan a vêng ang. Philippi 4:7

A hmasa berin, mihring thlamuanna mai aia sâng zâwk—Amah Pathian thlamuanna ngei chu mitin tân a awm a! Mihringin a pêk theih thlamuanna chuan tâwpchin a nei a, mahse Pathian thlamuanna chu tâwpchin nei lo, kan ngaihtuahna leh hriatna a khûm zo a ni. Pawn lam dinhmun buai nuaih leh hahthlak tak kan kaltlang mêk laiin, Pathian thlamuanna kaltlang hian chhûng lamah thlamuanna kan nei a ni. He thlamuanna hian kan thinlung leh ngaihtuahnate ngei pawh a vêng thei a. Pathian thlamuanna kan neih chuan hnualna, chauhna emaw lungkhamna kan nei lo a ni.

Thlamuanna ka hnutchhiah a che u; keima muanna ka pe a che u; khawvêlin a pêk angin ka pêk loh che u hi. In thinlung timangang suh ula, hlauh pawh hlau suh se. John 14:27

Kristian chu chak lo takin, mahse chakna nei siin a awm thei a; nâ tuarin, mahse thlamuanna nei siin a awm thei a ni. Nâ a tawrh chhan chu pawn lamah hrehawm nasa tak a hmachhawn vâng a ni a; thlamuanna a neih chhan chu chhûng lamah Lalpa a tawh a, Lalpa a khawih vâng a ni.
Nunna Hriatna, p. 55*

Pahnihna, Bible chuan engtiangin nge Pathian thlamuanna chu kan tawnhriat theih ang tih min hrilh a. Pathianin thlamuanna chu thil engemaw angin min pe lova, chu minung (person) angin min pe zâwk a—Amah Krista ngei chu. Thlamuanna dawng tûr chuan chhûng lamah Krista kan khawih a ṭul a. He thlamuanna tawnhriatna hi kan mihring thlarauah a inṭan a ni. Pathianin mihring chu thlarau neiin a siam a, mahse mihring tlûkna avângin kan thlarau chu a thi a, hna a thawk thei tawh lo a ni. Pathian thlamuanna nei tûr chuan kan thlarau tihnuntharleh chu tihmâkmawh a ni.

Rom 8:6-ah apostol Paula chuan, “Thlarau chunga ngaihtuahna nghah chu nunna leh thlamuanna a ni” a ti a. Hemi awmzia chu ngaihtuahna thlarau chunga nghah chu nunna chauh ni lovin, muanna pawh a ni a. Chuvângin, nunna chu Thlarau rah a ni a, muanna pawh chu Thlarau rah bawk a ni. Thlarau kan khawih chuan, nunna kan khawih a, chutiang bawkin muanna kan khawih a ni.
Nunna Hriatna, p. 64*

Pathumna, kan ngaihtuahna chu kan rilru bunghrangah chuan a hmahruaitu ber a ni a—tichuan ngaihtuahna kan nghahna hmun chu, kan nihna pumpui pawhin a zui a ni. Kan ngaihtuahna chu pawn lam thil thlengah a pumhluma a awm chuan, Pathian thlamuanna tawnhriatna kan nei thei lo a ni. Nung tak leh thlamuang taka awm a hnehin chhûng lamah kan thi ang. Kan ngaihtuahna chu kan thlarauva nghah leh chhûng lama awm Thlarau khawih kan zir ngei tûr a ni.

Kan chhûngah Pathian tam tâwk kan neih (gain) a, Pathian tawnhriatna kan neih a, Pathian nunna ṭhahnem tawk kan neih chuan, kan chhûngah muanna tam tâwk kan nei dawn a ni. He muanna hi kan chhehvêla muannna a ni lova, chhûng lam dinhmun muanawm a ni zawk.
Nunna Hriatna, p. 50-51*

Palina, Pathian kan tawnhriatna, Pathian nunna leh muanna te chu an kalkawp vek a. Pathian neihna tawnhriatna chu muannaah a rahchhuak a. He chhûng lama thlamuanna hi pawn lama muanna kan hmuh theih zawng zawng aiin a thûk zâwk a ni.

I ngaihtuahna khûm vek khawp muanna i zawng a, mahse thlamuanna Pathian chu i la hmu si lo a nih chuan, i thinlung hawngin Ama hnênah chuan tihian sawi la:

“Lalpa Isu, Ka mamawh che. Lalpa, ka ring a che. Ka chhûngah lo lût rawh! Tûnah ngei hian i nunna chu min pe la. I thlamuanna chuan min chhûngkhat rawh. Lalpa ka nunna leh ka himna i nih avângin ka lawm e, Lalpa, ka lawm e,” tiin.

A dawt leha kan thuziah, “Buaina leh Harsatna aṭanga Chhanchhuah ni tûra Lalpa Hming koh” tih chu a taka muanna neihna kawnga pui tûr che in i chhiar ngei dâwn nia.

*Thuziak lakchhuahte leh Bible châng te hi Copyright © by Living Stream Ministry a ni a. Bible chângte lakchhuahna "The New Testament Recovery Version Online" https://online.recoveryversion.bible


Midangte share ve rawh le