Buaina leh Harsatna aṭanga Chhanchhuah ni tûra Lalpa Hming Koh
Buainaah emaw, harsatna dinhmunah emaw hian, mite chu hrilhhai takin emaw, lo hmachhawn dân tûr hre lovin an awm ṭhin a. Chutiang hunah chuan mi tam tak chu an ṭawngṭai a, mahse eng dîlin nge kan ṭawngṭai a, eng angin nge kan ṭawngṭai? Kawng awlsam leh ṭangkai êm êm chu Bible-a kan hmuh angin Lalpa hming koh a ni (Rom 10:13). Kohna chu ṭawngṭai dân kawng bîk pakhat a ni a; Ngenna)emaw, inbiakna narân emaw ni lovin, nung taka min siamtu leh kan thlarau lam chakna vawngṭhatu thlarau lam thâwk la tûra insawizawina a ni.
Khuarkhurum hnuaihnung ber aṭang hian, Aw Jehova, i hming ka ko va. Ka aw chu nangin i hria a; ka thâwk laa ka au thawmah i beng hup suh ang che,” Ṭah Hla 3:55-56.
A chunga Bible chângah khian, Jeremia chuan Lalpa (Jehova) koh chu Ama hnêna auchhuah leh thlarau lam boruak (air) thâwkluhna a ni tih a sawi a. Hetiang kawnga Lalpa hming kohna hian kan buaina leh harsatna aṭangin chhûng lamah rang takin min chhanchhuak ṭhin a ni.
Sâm 118:5 ah Sâm ziaktu chuan, “Ka manganna aṭangin Jehova chu ka ko va; Jehova chuan min chhâng a, hmun thawl takah min awmtîr ta a,” tiin a sawi a. Sâm 50:15 ah pawh, “Tin mangan nîah chuan mi ko la; ka chhanhim ang che, tichuan nangin mi chawimawi ang,” tih kan hmu bawk a. Hêng chângte hian kohna chu buaina leh harsatna ata chhanchhuahna tawnhriatna kawng a ni tih uar takin an sawi a ni.
“Lalpa kan koh chhan tûr dang leh chu manganna lak aṭang te (Sâm 18:6; 118:5), buaina lak aṭang te (Sâm 50:15; 86:7; 81:7) lungngaihna leh tuarna (Sâm 116:3-4) lak aṭang tea min chhanhim tûrin a ni a. Lalpa koh chungchâng hnialkalhtute ngei pawh harsatna bîk engemaw, dam lohna nasa tak emaw an tawh meuh chuan, Lalpa an ko tih an inhre chhuak ṭhin. Kan nun chu harsatna laka a zalen chuan, Lalpa koh chu kan hnialkalh a ni mai thei e. Buaina a lo thlen erawh chuan, Amah ko tûrin tuma hrilh kan ngai lo; chawplehchilhin kan ko mai ṭhin a ni.”
Kristian Nun Innghahna Bulpuite, Volume 1, p. 34*
Lalpa hming koh hi thil thar a ni lo va. Bible tluanah kan hmu zâwk a ni (Gen. 4:26, Gen. 12:8, Tirh. 22:16, 2 Tim. 2:22). Nimahsela a taka nunpuina chu kum zabi tam tak hloh a ni tawh a, ṭhenkhat phei chuan an ngai dik lo hial a ni. Tirhkohte Thiltih buah, Kristian hmasate zîngah an hmang nasa hle a, Lalpa hming an kohna hmangin tute nge an nih tih awlsam takin a hriat theih hial a ni (Tirh. 9:14, 21). Buaina leh harsatna kan tâwk emaw, tâwk lo emaw, eng dinhmunah leh khawi hmunah pawh Lalpa hming hi kan ko thei a ni (1 Kor. 1;12).
Tirh. 2:21 chuan, “Tin heti hi a ni ang a, tupawh Lalpa hming ko apiang chu chhandamin a awm ang,” a ti a.
Tûnah hian chhandama awm i duh chuan, Lal Isua hming ko la, a hnênah tihian hrilh ang che:
“Aw Lalpa Isu! Aw Lalpa Isu! Aw Lalpa Isu! Awlsam têa i hming ka koh theih avâng hian kan lawm e. Ka aw i ngaihthlâk avângin ka lâwm e. Lo kal la, min chhandam rawh. I lamah ka inhawng e. I hming ka ko a ni, Aw Lalpa Isu! Ka hmangaih che,” tiin.
Chubâkah Rom 10:12 ah chuan Isua chu mi zawng zawng Lalpa, Ama hming kotu apiangte chunga hausa a ni tih a sawi bawk a. Lalpa hming kan kohna hmangin a hausakna tawnhriatna kan nei chhunzawm reng thei a ni. Taksaa thâwk kan la ang chiah hian, kohna chu dinhmun tinrêng leh khawi hmunah pawh kan Pathian hausa tak tawnhriatna kan neihna kawng a ni.
Lalpa hming koh chungchâng hi Basic Elements of the Christian Life, Volume 1 a, “Lalpa Hming Koh” tih bungah zau zawkin i chhiar thei ang. A thlawna dawng tûrin i chah thei e.
*Thuziak lakchhuahte leh Bible châng te hi Copyright © by Living Stream Ministry a ni a. Bible chângte lakchhuahna "The New Testament Recovery Version Online" https://online.recoveryversion.bible