Rhema Literature Distributors hi tum pakhat chiah nei - Kristian lehkhabu quality ṭha ber ṭhahnemngai taka lei pumpuia semchhuah - tumtu ringtu inzawmkhâwm pâwlkhat a ni a. Ram 100 chuangah ṭawng 40 chuangin, kalphung mâwl tak neiin kan semchhuak a - chu chu kan lehkhabu zawng zawngte hi a thlâwn veka pêk an ni. Bible hrethiam tûr leh kan nitin nuna Krista tawnhriatna nei tûra nasa taka min pui thei tûr lehkhabu kan semchhuak a. A bik takin, a thuziaktuten pawimawh an tih bu engemaw zât semchhuak tûrin Living Stream Ministry nen kan thawkho bawk. Keini hi khawvêl pumpuia ringtu leh kohhranho thilpêkte avânga semchhuak thei nonprofit charity kan ni a. Anni hian thûk zâwk leh tlai thlak taka Pathian hre duhtu zawng zawngte hnena a thlâwna châwmna kawng zâu tak ni tûrin mawh min phurtir a ni.
Miten kan rinna chungchâng min zâwt fo ṭhin a. Hetah hian kan rinna sawina a awm a. Kan lehkhabu dawng thei tûrin heng rinna hi zawm tûra phûtna a awm lo va. Kan lehkhabute hi eng ang rinna nei pawh nise, mitin tân a thlâwnin a awm vek a ni.
Thuthlung Thar chhûnga thu awm, mi zawng zawng tâna pêk, ringtu zawng zawngte rinna inṭawm hi keini Rhema pawhin kan ṭawm a. A bik takin, he Thuthlung Thar rinna thuhmun hi Bible, Pathian, Krista, chhandamna leh chatuan hun chungchânga kan rinna chu a hnuaiah hian sawilan an ni:
1. Bible chu pathianna thupuan famkim a ni a, thu tinte hi Thlarau Thianghlim kaltlanga Pathian thâwkkhum an ni. 2. Pathian chu anpui nei lo leh chatuan mi a ni a, nimahsela Pa, Fapa leh Thlarau anga chatuana pathum ni bawk si an ni a, an pathum hian ṭhenhran theih loh, thliarhran theih si an ni. 3. Kristaah Pathian chu mihring dik tak, famkim tak Isua ni tûrin tisaah a lo chang a. Krawsah khenbeh a ni a, kan tlanna tûrin aiawh thihnain a thi a. Nithum nîah mitthi zing ata a tholeh a, tihropui taksa nen a tholeh a ni. Pathian kut dinglamah a lâwnchho va, engkim Lalpa atân siamin a awm a. 4. Mihring chuan thil a tisual a, a sual bawk a, chutiang mi a nih avâng chuan Pathian rorêlsakna hnuaiah a tlu a ni. Mahse Krista aiawh thihna kaltlangin, mihringin sual aṭanga chhandamna a dawnna tûr kawng leh Lal Isua Krista a rinna tûr kawng chu hawnin a awm a. Miin Pathian lama a sim a, Lal Isua Krista a rin veleh, chatuan chhandamna, sual ngaihdamna, Pathian hmâa thiamchanna leh Pathian nena inremlehna hial a dawng a ni. Hemi behchhan hian, chhandam tawh mi chuan pathianna nunna leh zia chu a dawng a, chu chuan Pathian faah a siam a, ringtu zawng zawng an ṭhan a, puitlinna lama sakchhoh an nihna Krista Taksa pêngah a siam a ni. 5. Krista chu a hnenah Amah ringtute dawng tûrin leiah a lo kal leh ang a. Chatuanin, Pathianin a thlante a chhandamna vawrtâwp, Jerusalem Tharah Pathian nen kan chêngdun tawh dâwn a ni.Rhema-in kan thlentum ber chu a chhiartu zawng zawngten he Thuthlung Thar rinna an hriatthiam a, tawnhriatna an neih tilian lehzual thei tûra Kristian rinna hriatthiamna kawnga pui tûr thu ziakte a thlâwna sem a ni a. Ringtute hian a tlanna kaltlangin Krista chatuan chhandamna chauh an chên lo va, A nunnaah nitin chhandamin an awm bawk a, chu chu Bible ami thlarau lam chaw a taka chantirna, hmanchhuah nghâl theih chu a ni. Hei hi keini pawhin tawnhriatna kan lo nei tawh ṭhin a; nangni tân pawhin in neih kan beisei a ni.
Kum 1980 laihâwl vêl aṭang khân, Rhema chuan a thlâwnin lehkhabu a semchhuak ṭan a. Tûn hma Soviet Union ramhovah Russian ṭawngin Bible leh thlarau lam lehkhabute kan semchhuak hmasa ber a. Kan thil semchhuahna hmanrua ber chu a rawn diltute hnena dak hmanga thawn a ni a, mahse hmun tam takah Pathian Thu thutak tidarh tûrin group dangte kan thawhpui bawk a ni. Kum 1999 ah Russian ṭawnga kan beihna zawng zawng chu footnote zâu zâwk leh study material nei Russian Thuthlung Thar thar hlak semchhuahna lian takin a vawrtâwp a thleng a ni. Kum 2001-ah, Rhema chuan ṭawng dang leh ram danga thlarau lam thu leh hla a thlâwna pêk mamawhna awmte a ngaihtuah chho ṭan a, tichuan leia hmun lian tak tak huamtel khawpin zawimuangin kan inzauh chho ta a ni. Kan chêtna hmasa berah chuan, ṭawng chi hrang sâwm kan belhchhah a, semchhuah theih tûrin lehkhabu set engemaw kan buatsaih bawk a. Kum 2006-ah, Rhema chuan ṭawng dang nei tûra ruahmanna a siam leh a, chu chuan Middle East leh Asia ram tâna pawimawh tak tûrte a huamtel a ni. Heng kum 20 chhûng hian, Kristian literature maktaduai chuang semchhuah an ni a - a vai hian a thlâwn veka pêk an ni.
Mi tam takin an awmna hmun leh khawvêl pumpuia semchhuahna hnaa tel ve an châk a. Thuchiang zâwk hriat an duhnate chu kan ngaihlu a, tin hemi bungah hian i rawn zawm ve theih dân kawng nena rawn chhânlet che kan duh a. Hemi bung hi a tel ve duhte tân bung thumah kan ṭhen a: ṭawngṭaina hmangin, donation hmangin, semchhuahnaa mahni ngei telvena hmangin. Tel ve theihna kawng hmasa leh pawimawh ber chu ṭawngṭaina hmangin a ni a. Ṭawng hrang leh ram hrang hranga a thlâwna lehkhabu kan semchhuahna kawngah, 1 Timothea bung 2-a kan hmuh mite chhandamna atâna ngenna a bik taka ṭawngṭaina hi a pawimawh êm êm a ni. Chuvângin,a hmasa berah, thil dil ṭawngṭaina te, ṭawngṭaina hrim hrim te, ṭawngṭaisakna te, lawmthu sawinate mi zawng zawng tân siamsak tûrin ka fuih a che; lalte leh thuneitute zawng zawng tân pawh, Pathian ngaihsak leh zahawm taka inrema thlamuanga kan khawsak theih nan. Chu chu min Chhandamtu Pathian ngaihin a ṭhain a lawmtlâk a ni, Ani chuan mi zawng zawng chhandama awmah leh thutak tluantling hriaah a duh a ni. 1 Tim. 2:1-4. A hnuaia mi hi chhinchhiah ila:
Ṭawngṭaina tûr hrang hrang chuan dilsakna, ngensakna leh mite aiawha lawmthu sawinate a huam a. Ṭawngṭaina chuan mi zawng zawng lam hawi a ni a, lalte leh rorêltute pawh huamtel an ni. Vawiina khawvêl dinhmun kan ngaihtuah hian, hei hi Pathian thilduh tihfamkimna chabi a ni tih a chiang lehzual a. Pathian chuan thil duh thuah hnih a nei a: mi zawng zawng chhandama awmah leh thutak tluantling hriatna nei tûrin. Ṭawngṭai chunga kan lo tel vena hian he a thilduh hi a lanchhuahtir bawk tûr a ni. Hei hi a bik tak leh tum neia ṭawngṭaina a ni a, a chhan chu nun muang leh hahdam neih mamawhna a sawitel vâng a ni. Hetiang dinhmunah hian Pathian chuan mite chhandamna kawng a nei a, thutak hriatna tluantlinga hruaina kawng a nei a ni.Kan tawnhriat tawh aṭanga kan hriat chu, Pathian mite a bik taka engemaw dil an ṭawngṭai chuan, kum engemaw zât ral hnuah chung an thil dilte chu an a thleng ngei ngei tih hi a ni. Heng lehkhabute hian thutak hriatna tluantling chu a thlâwna an tihdarh zêl theih nân hetiang kawnga ṭawngṭai ṭhin mi tam tak neih hi kan beisei takzet a ni.
Rhema hi hlawkna um lo corporation, kum 1982-a Washington State, United State of America-ah Internal Revenue code section 5019©(3) hnuai din a ni a. Chutah chuan Board of Directors Rhema sum hman dân enkawltute an awm a. Thilpêk zawng zawng chu lâwm taka dawn an ni a, Bible leh Kristian thuziakte thehdarh nâna hman a nih bâkah thil chi hrang hrang, Bible chhûnga thutak tawnhriatna leh hriatthiamna tûrin conference leh seminar buatsaih nanahte hman a ni ṭhin a. I mimal chungchâng hi sumdâwnna thilah emaw organization dang hnênah pêk a ni lo vang
Pe rawh u, chutichuan pêkin in awm ang; ṭhahnemngai taka teh a, beng muk a, liam zawih zawihin, inmal chungah an pe ang che u. In tehna ngai bawkin an tehsak leh dâwn si che u a (Luka 6:38). Rhema hnêna pe tûra Lalpan phurrit a pêkte chuan a hnuai ami ang hian an pe thei ang:
Chuvângin, kal ula, hnamtin zirtirahte siam ula, Pa leh Fapa leh Thlarau Thianghlim hmingah chuan baptis ula, thu Ka pêk zawng zawng che u pawm tûrin zirtir rawh u. Tin, ngai teh u, Kei kumkhuain, khawvêl tâwp thleng pawhin, in hnenah ka awm zêl ang (Matthaia 28:19-20). Nimahsela Thlarau Thianghlim in chunga a lo thlen hunah thiltihtheihna in la nei ang, tichuan Jerusalem khuaah te, Judai leh Samari ram khaw tinah te, kawlkil thleng pawhin min hriatpuitute in ni ang. (Tirhkohte Thiltih 1:8)
Hmun hrang hranga a thlâwna semchhuahnaa tel ve duhte chuan, khawngaihin min rawn bepawp dâwn nia.
Kan lehkhabute hian Bible hre tûrte, Krista chungchâng zir tûrtein a pui thei che a, tin i Kristian nuna puihna hmanchhuah nghâl theih a pe bawk ang che. He lehkhabu indawt hian set thum nei lehkhabu 7 a kengtel a. A thupuite hian a indawt dân ang zêlin hma a sâwn chho tial tial a, mitin châwmna duhawm tak a ni bawk.
Learn More